चलचित्र क्षेत्रकाे लागि इतिहासकै कालो बर्ष: चलचित्र समिक्षा २०७७

काठमाडौ,

नेपाली चलचित्र क्षेत्रका लागि बर्ष २०७७ इतिहासकै कालो बर्ष बन्यो । कोरोना महामारीका कारण गतबर्षको फागुणदेखि नै सुस्ताएको चलचित्र क्षेत्र यो बर्ष नराम्रोसँग थलियो । चलचित्र प्रदर्शनका लागि तयार भएका निर्माता रिलिज मिति पोष्टपोन्ड गर्न वाध्य भए । वर्षभरी २ सय हारहारीका चलचित्र रिलिज गर्ने हलहरु सुनसान बने । जूमखबर संवादाता संगम अधिकारीले तयार पारेकाे रिपार्ट ।

मल्टिप्लेक्स हलमा लगानी गरेका निर्माता शशंकित हुने अवस्था आयो । धेरै सिंगल हलहरु अब उठ्न नसक्ने गरी थला परेका छन् । यो बर्ष प्रदर्शनको हिसाबले नेपाली चलचित्र क्षेत्र निकै निराशाजनक देखियो । यो बर्ष जम्मा ४ वटा चलचित्र मात्र रिलिज भए । तर, चारै चलचित्र हेर्न दर्शक हलसम्म आएनन् । अरु निर्माताले चलचित्र रिलिज गर्ने हिम्मत नै गर्न सकेनन् ।

हल खुलेपछि माघ १ गतेबाट मल्टिस्टारर चलचित्र ‘एउटा यस्तो प्रेम कहानी’ यो बर्षको पहिलो फिल्मको रूपमा रिलिज भयो । तर, यो चलचित्रले दर्शकलाई हलसम्म तान्न सकेन । शिव श्रेष्ठ, प्रियंका कार्की, वर्षा राउत, आयुष्मान देशराज जोशी, संजोग कोइराला, शक्ति श्रेष्ठ, कविता मानन्धर लगायतका कलाकारले अभिनय गरेको यो चलचित्रले हलमा दर्शक फर्काउने अपेक्षा गरिएको थियो । तर, चलचित्रले दर्शक तान्न सकेन।

बर्ष २०७७ को दोस्रो रिलिज चलचित्र ‘गोर्खे’ थियो। चैत्र २१ गतेदेखि रिलिज भएको फिल्ममा रबिन्द्र प्रताप सेन, अञ्जली अधिकारी र अर्जुन गुरुङको मुख्य भुमिका थियो। यो फिल्म पनि सफल हुने आशा थियो तर, यो चलचित्रले पनि दर्शकलाई हलसम्म तान्न सकेन । चलचित्रको चरम अभाव भैरहेको समयमा यी चलचित्रले मल्टिप्लेक्समा राम्रो शोज त पाए । तर, दर्शकले चलचित्रप्रति रुची देखाएनन् ।

बर्षको अन्तिम शुक्रबार अर्थात चैत्र २७ गते बाट २ वटा नेपाली चलचित्र रिलिज भएका छन् । बर्षको तेस्रो र चौथो फिल्मको रूपमा ‘श्री’ र ‘गुड फ्रेन्ड’ रिलिज भएका हुन। कोरोनाका कारण लकडाउन हुँदाको कथामा बनेको ‘श्री’ मा कलाकारहरु सन्दिप क्षेत्री, बर्षा सिवाकोटी, बुद्धि तामाङ र रबिन्द्र झा आदिको मुख्य भूमिका रहेको छ। उता पहिले नै निर्माण भएको ‘गुड फ्रेन्ड’ फिल्ममा मुकेश ढकाल र सबिना कार्कीको अभिनय देख्न पाईन्छ।

यो बर्ष कोरोनाको कहरका कारण पनि नेपाली चलचित्रले निक्कै ठूलो घाटा व्यहोरेको छ । तर, कोरोनाको दोश्रो चरणको लहर सुरु भएका कारण पनि अर्को बर्ष पनि चलचित्र क्षेत्रको अवस्था के हुने हो, अहिले नै भन्न सकिने अवस्था छैन ।

प्रदर्शन निराश तर छायांकन आशातीत

यो बर्ष चलचित्र प्रदर्शन नभएपनि निर्माताले हिम्मत भने हारेनन् । सस्तादेखि महंगो बजेटमा चलचित्र छायांकनको क्रम भने रोकिएन । कात्तिक १ गतेबाट सुचारु भएको चलचित्रको छायांकन आजका दिनसम्म पनि तेजका साथ अगाडि बढेको छ ।

चलचित्र ‘आई एम ट्वान्टी वान’को छायांकन कात्तिक १ गतेबाट सुरु भयो । बाँकी रहेको चलचित्र ‘ए मेरो हजुर ४’को छायांकन पनि कात्तिक १ बाट नै सुरु भएको थियो । यसपछि, ‘हिड्दा हिड्दै, कृष्णलिला, मनसँग मन’ लगायतका चलचित्रको छायांकन भयो । नाम चलेका ब्यानरहरुले पनि चलचित्रको छायांकन अगाडि बढाए ।

‘सम्हालिन्छ कहिले मन’को निर्माण टिमले दुई साता लगाएर दुबई पुगेर चलचित्रको छायांकन सकाएको थियो । चलचित्र ‘चिसो मान्छे, डिसेम्बर फल्स, कौसिक, गणपति, राधा, चुरीफुरी’ लगायतका चलचित्रको छायांकन पनि यही बर्ष सकियो ।

चलचित्र ‘प्रकाश र बिहे पास’को छायांकन धमाधम भैरहेको छ भने अन्य केही चलचित्रको छायांकन सुरु गर्ने तयारीमा निर्माता छन् । चलचित्र ‘अनन्त’को छायांकन शनिबारदेखि सुरु भएको छ । ‘कबड्डी ४, बाबरी, घिन्ताङ, मिरर’ लगायतको छायांकन वैशाखबाट सुरु गर्ने तयारीमा निर्माता लागेका छन् ।

यसरीहेर्दा, यो बर्ष चलचित्र प्रदर्शनका हिसाबले निराशाजनक देखिएपनि छायांकनका हिसाबले भने आशातित देखिएको छ । आउँदो बर्ष कोरोनाको जोखिम कम भएको खण्डमा चलचित्र रिलिजको सेड्यूल निकै व्यस्त हुने देखिएको छ । आशा गरौं अर्को बर्ष नेपाली चलचित्रको ब्यापार राम्रो हुनेछ।